MAHUSIANO NA UPENDO BAINA YA MTU NA MUNGU

Kwa maana jinsi hii Mungu aliupenda ulimwengu, hata akamtoa mwanawe pekee, ili kila mtu amwaminiye asipotee, bali awe na uzima wa milele (Yohana 3:16). Ni hakika kuwa Mungu aliupenda kwanza ulimwengu na ndivyo ilivyo siku zote kuwa Mungu anatupenda sana na anashughulika na mambo yetu wakati wote.

Ili tupasa na inatupasa tumpende kwa kushika amri zake na maneno yake lakini hilo limekuwa mtihani kwa binadamu wengi. Hivyo kwa binadamu upendo ndio sheria kuu na ya kwanza ili kuufikia ufalme wa Mungu (kumbukumbu 6:5) “mpende BWANA MUNGU wako kwa moyo wako wote, kwa nguvu zako zote na kwa akili zako zote”.

Kama ilivokuwa ‘imani’ kusikia na kutii neno la Kristo, na imani ikiwa timilifu inajenga jumla ya utegemezi wa mambo yote kwa Kristo ambayo tuaiita ‘tumaini’. Basi upendo nao huhakikiwa kutokana na Tumaini thabiti lakini haya mambo yote Hufanywa na Roho wa Mungu kwa wanadamu, hayapo ndani ya uwezo wa Mwanadamu mwenyewe (Warumi 5:4-5).

MAHUSIANO

Mtu yeyote ampendaye Mungu hulishika  neno lake (Yohana 14:15). Hapo Mungu humpenda na ndipo mahusiano hujengwa, maana Mungu huja na kuishi pamoja naye(Yohana 14:23). Tukumbuke kuwa Mungu ni Neno na kila mtu ashikaye neno tayari anajenga mahusiano na Mungu (Yohana 1:1)

Ajabu ni kwamba ni ngumu kulishika neno la Mungu bila kumwamini Kristo maana maandiko yote matakatifu yanashuhudia juu yake na yanataka tumwamini yeye maana ndiye anaye shughulika na mahusiano ya Mungu na Wanadamu kama Muunganishi. “Kila amwaminiye asipotee bali awe na uzima wa milele”. Bila Kristo hakuna mahusiano baina ya Mungu na Mwanadamu.

Yohana 6

^"37wote anipao Baba watakuja kwangu wala yeyote ajaye kwangu sitamtupa nje kamwe…………………………………⁴⁰kwa kuwa mapenzi yake Baba yangu ni haya, ya kwamba kila amtazamaye mwana na Kumwamini yeye, awe na uzima wa milele; Nami nitamfufua siku ya Mwisho”. 

UPENDO

Upendo hubeba mambo mengi ikiwa ni pamoja na Imani, tumaini, rehema, neema, stala, ujasiri, uvumilivu (1Petro 4:8, 1Wakoritho 13:4-8).

Kwa kifupi Mungu ni upendo, mtu ayafanyae matendo yanayo thibitisha upendo anamjua Mungu, maana upendo unatoka kwa Mungu(1 Yohana 4: 7-11). Tuseme basi upendo huthibitika kwa tendo jema litokalo katika moyo wa mtu ambalo chanzo chake ni Mungu. Upendo sio maneno matupu ya ulimi au jambo la kufurahisha au kunufaisha tu (Yohana 3:18-24) bali ni jambo litokalo kwa Mungu ambalo linampendeza Mungu.

Yesu anampenda Mungu Baba (Yohana 14:31) lakini Mungu Baba anampenda sana Bwana Yesu, mwana wake wa pekee (Yohana 15:9-13, Mathayo 3:17). Pia ulimwengu unatakiwa kufahamu kuwa Mungu anapenda sana walimwengu hata akamtoa Mwana wake wa peekee ili kila anaye mwamini asipotee bali awe na uzima wa milele.

Kuna haja ya kujua mahusiano na upendo wa Mungu na wanadamu kwa undani hasa katika Nyanja ya mtu mmoja mmoja.

Mfano Petro na Yohana, au Yakobo na Esau. Biblia inaonesha wazi kuwa Yesu alimpenda sana Yohana, kuliko hata wanafunzi wake wengine, lakini Petro alionesha kumpenda sana Kristo Yesu kuliko wanafunzi wengine. Pia katika agano la kale kwenye maandiko matakatifu inaonesha Mungu anampenda sana Yakobo kuliko Esau

Pia ukitizama jinsi Nabii Daniel alipenda utauwa na kutafuta sana maandiko na neno la Mungu juu ya taifa lake la Israel kutoka kwenye vitabu vya manabii wengine na kwa kufunga pamoja na sala. Hili lilimfanya kushika neno la Mungu na hilo neno likakaa ndani yake. Hii ilipelekea Mungu ampende Daniel na kujidhihirisha kwake mara kwa mara (Daniel 9:21-23, Yohana 14-21)

Binadamu akitenda  jambo Mungu analomuamuru basi hawi mtumishi bali huwa rafiki (Yohana12,14,15) na uhusiano huonekana wazi.

Yakobo alipendwa na Mungu kuliko Esau kaka yake, ni kutokana na utiifu aliokuwa nao. Katika ndugu hawa wawili yaliibuka mataifa makubwa mawili. Yakobo ndie baba wa taifa la Israel, na Esau ndiye baba wa taifa la Edom. Isreal ni taifa lilipendwa na Mungu tangu awali, katika maandiko matakatifu inaonesha ndio taifa ambalo ukombozi wa ulimwengu ulitakiwa uanzie kabla ya kuenda kwenye mataifa mengine.

Ingawa wana wa Israel (Yakobo) walishindwa kutii neno la Mungu na kukiuka amri zake. Hivyo Mungu alituma manabii na wajumbe wengi kuwaokoa lakini waliwaua nakuzidi pindua sheria za Mungu ili kufuata njia zao wenyewe. Lakini Mungu aliipenda Israel na bado anaipenda, hivyo aliamua kuwakomboa kwa mkono wake mwenyewe yaani Yesu kristo kusudi arejeshe mahusiano kwa neema na kwa njia ya imani. Ili kwa kumwamini Yesu Kristo Israel ikombolewe lakini bado Israel haikumpenda Mungu (1 Yohana 4:8-9, Luka 13:34)

Kwa sababu wana wa Israel walimkataa Mwenyenzi Mungu pamoja na neema ya ukombozi wake. Basi ukombozi uliwekwa kuwa neema kwa mataifa yote ili Israel aone wivu kwa ajili ya utukufu wa Mungu(Warumi 10:19). Mungu aliamua kuukomboa ulimwengu wote na hasa kwa wale waliokuwa tayari kumpokea na kumwamini Yesu Kristo. Hivyo Mungu huwapenda wale wanaomwamini na kumtii tena huwaokoa kwa neema na rehema nyingi na kuwafanya kuwa wana wake (Yohana 1:11-13, Efeso 2:8-9).

Binadamu hawezi kuwa timilifu pasipo Kumpenda Mungu. Tukimpenda Mungu kwanza ndipo tunaweza kusema tunawapenda binadamu wenzetu, kwamaana Mungu huja na kuishi pamoa nasi na kujidhihirisha kwetu. Mungu anatupenda wanadamu wote ikiwa tukimpenda na sisi kwa moyo wetu wote, kwa nguvu zetu zote, na kwa akili zetu zote basi tutakuwa salama na kuurithi ufalme udumuo milele katika uzima wake (Efeso 2:17-19)